Ons kerkgemeenskap stel ‘hosts’ of kuiergroepe bekend en ek en Deon kuier in die week met almal wat bereid is om sulke groepe by hulle huise te begin. Ek kan sien dat hierdie ‘hosts’ mense is wat regtig lief is vir ander. Net gewone mense, gemaklik, sonder pretensie, mense wat iets verstaan van gee, sonder om te verwag, en wat weet van gasvry wees, gemaklik rondom ‘n etenstafel.

Na ons kuier, probeer ek my indink wat ons gemeente sal sê van kuiergroepe. Hoe sal dit voel om bý iemand te kuier en te eet wat ek glad nie ken nie? En hoe sal dit wees om sáám met ander te kuier, wat ek ook nie ken nie? Iemand wat ouer is as ek, of dalk jonger? Om die waagmoed te hê om my naam op ‘n papier te skryf as deel van ‘n kuiergroep, en dan te glo dat dit lekker sal wees? Om op te daag waarheen ek genooi is, en om deel te neem aan dit wat rondom my gebeur?

Om my te help met antwoorde, ondersoek ek die woord ‘host’. In die eenvoudigste vorm, beteken dit: Iemand wat mense ontvang as gaste. Verder beteken ontvang, om iets wat vir jou gegee word, te neem, asof dit joune is. Om te groet, en om te verwelkom, om teenoor iets of iemand op ‘n sekere manier op te tree en om verantwoordelikheid vir iets, te aanvaar . In Engels gee dit meer inligting: ‘to take delivery of, to accept, to collect, to hear, to hold, to pick up, to catch, to gather, to perceive, to redeem and to inherit. To come into and to get from, to be told, and to be given.’

En ek voel gerus, want ek wéét, dat elke gasheer en gasvrou wat ek ontmoet het, net perfek is. Hulle sal dít kan neem, wat vir hulle gegee word. Kan groet en kan verwelkom. Vol verwagting ontvangs kan neem van elke storie om elke tafel, kan aanvaar, wie by hulle kuier, versamel, wat hulle hoor, vashou, wat hulle sien, optel, alles wat nodig is, en vang, dit wat wil val. Bymekaarmaak, verstaan tussen lyne, herstel wat seer is en gee, wat hulle kan.

Ek weet, al die vrae sal dan nie meer saak maak nie, want soos die bekende Mr. Rogers sê: There isn’t anyone you couldn’t learn to love, once you’ve heard their story.

Ek voel opgewonde. Ons is ‘n gemeente met stories.